Dæluskipið Álfsnes, sem sér um dýpkun í og við Landeyjahöfn, fer úr slipp klukkan 16 í dag og siglir til Vestmannaeyja í kvöld. Skipið verður þannig tilbúið til starfa seinnipartinn á morgun. Þetta segir G. Pétur Matthíasson, upplýsingafulltrúi Vegagerðarinnar, í samtali við Eyjafréttir.

„Álfsnesið er enn í slipp, en fer niður núna kl. 16:00 í dag og siglir af stað til Vestmannaeyja í kvöld,“ segir Pétur. Hann segir erfitt að spá nákvæmlega fyrir um hvenær hægt verði að hefja dýpkun, þar sem veður og sjólag ráði mestu um framvindu verksins.

„Ölduskilyrði til dýpkunar eru ekkert sérstaklega vænleg næstu vikuna,“ segir hann. „En Álfsnesið verður komið og reiðubúið til starfa seinnipartinn á morgun og fer í það verk um leið og aðstæður leyfa.“

Dýpkun í Landeyjahöfn er forsenda þess að Herjólfur geti siglt samkvæmt fullri áætlun milli lands og Eyja. Tafir á dýpkun hafa því haft áhrif á samgöngur undanfarna daga.

Áætlun Herjólfs í dag og á morgun

Herjólfur siglir til Landeyjahafnar í dag samkvæmt eftirfarandi áætlun:

• Brottför frá Vestmannaeyjum: kl. 13:30 og 16:00
  (Ferðir kl. 14:30 og 17:00 færast)

• Brottför frá Landeyjahöfn: kl. 15:00 og 19:00
  (Ferðir kl. 15:45 og 20:45 færast)

Vegna breytinganna passar áætlun Strætó því miður ekki við brottfarir seinnipartinn í dag.

Á morgun, þriðjudag 4. nóvember, siglir Herjólfur til Þorlákshafnar:

• Brottför frá Vestmannaeyjum kl. 07:00

• Brottför frá Þorlákshöfn kl. 10:45

Tilkynning vegna siglinga seinnipartinn verður gefin út klukkan 15:00 á morgun, segir í tilkynningu frá skipafélaginu.