Dýpi í Landeyjahöfn er enn ekki orðið nægilegt til siglinga til og frá höfninni nema við bestu aðstæður, samkvæmt tilkynningu frá Herjólfi ohf. Þar segir jafnframt að tilkynning um siglingar Herjólfs seinnipart dags verði gefin út fyrir klukkan 15:00, en fyrsta ferð dagsins var til Þorlákshafnar.

Eyjafréttir hafa jafnframt heimildir fyrir því að dýpkunarskipið Álfsnes hafi verið við störf í og við höfnina í nótt. Dýptarmælingin sem vísað er til í tilkynningu Herjólfs er hins vegar frá því í gær og því má búast við að staðan verði endurmetin þegar nýjar mælingar liggja fyrir.