Dýpkun í Landeyjahöfn gekk ágætlega í gærkvöldi og hafa aðstæður leyft áframhaldandi vinnu í morgun. Þetta kemur fram í upplýsingum frá G. Pétri Matthíassyni, forstöðumanni samskiptadeildar Vegagerðarinnar.

„Dýpkun gekk ágætlega í gærkvöldi. Hún hófst aftur klukkan 08:00 í morgun og útlit er fyrir að aðstæður verði áfram ásættanlegar á þessu flóði,“ segir Pétur.

Eftir erfiða daga virðist sem loks hafi skapast betri gluggi til dýpkunar, þar sem sjólag er hagstæðara en áður. Dýpkunarframkvæmdir hafa undanfarið verið mjög háðar ölduhæð og aðstæðum í hafnarmynninu, en jafnvel stuttir gluggar geta skipt miklu máli fyrir framgang verksins. Ekki þarf að fjölyrða um mikilvægi þess að Landeyjahöfn opni fyrir áætlunarsiglingar Herjólfs sem fyrst, enda fyrsti dagur sumars á morgun.