Ekki tókst að hefja dýpkun í Landeyjahöfn á flóðinu í morgun þar sem aðstæður reyndust óhagstæðar. Þetta kemur fram í upplýsingum frá G. Pétri Matthíassyni, forstöðumanni samskiptadeildar Vegagerðarinnar.

„Það gekk ekki að dýpka á flóðinu í morgun, ölduhæð og öldulengd hömluðu því og eins brot í hafnarmynninu,“ segir Pétur. Gert er ráð fyrir að ný tilraun verði gerð síðar í dag ef aðstæður leyfa. „Það verður reynt aftur í kvöld,“ segir Pétur.

Þá má geta þess að vinna um borð í Herjólfi gekk vonum framar og er hann kominn aftur í áætlun milli Vestmannaeyja og Þorlákshafnar.