Þjóðhátíðargestir skemmtu sér konunglega í gærkvöldi í Herjólfsdal. Í tilkynningu frá skipuleggjendum segir að tónleikadagskráin á stóra sviðinu hafi verið sannkölluð flugeldasýning sem hófst með VÆB-bræðrum. Þá steig Stuðlabandið á svið með söngvurunum Röggu Gísla, Selmu Björns og Friðriki Ómar. Hápunktur kvöldsins á stóra sviðinu var þegar Herra Hnetusmjör steig á svið. Í framhaldi af honum komu FM95Blö-menn fram ásamt Jóhönnu Guðrúnu og síðan hélt Aron Can sína síðustu tónleika í bili, ef marka má yfirlýsingar hans frá því fyrir helgi.

„Það var stórkostlegt að sjá brekkuna lifna við í gærkvöldi. Nú höldum við ótrauð áfram inn í síðasta daginn af þessari Þjóðhátíð sem nú þegar hefur skrifað sig á spjöld sögunnar,“ sagði Jónas Guðbjörn Jónsson, formaður Þjóðhátíðarnefndar, undir morgun. „Ég má til með að ítreka þakkir til allra gestanna fyrir þrautsegju og allra Vestmanneyinganna sem slógu velferðarskjaldborg yfir gestina okkar í gær og fyrri nótt.“

Í kvöld heldur tónlistarveislan áfram. Stuðlabandið hefur sett saman kvölddagskrá með söngvurunum Stefáni Hilmarssyni, Siggu Beinteins, Emmsjé Gauta, GDRN og goðsögninni Björgvini Halldórssyni. Síðan tekur við Brekkusöngurinn, sem Magnús Kjartan stýrir enn eitt árið. Þá verður brennan loks tendruð, blysin verða á sínum stað og tónlistin heldur áfram fram undir morgun.

Þá barst tilkynning undir morgun frá Herjólfi þess efnis að siglingar í Landeyjahöfn hæfust aftur frá og með 5:30 í morgun.