Að sögn Sindra Viðarssonar, sviðsstjóra uppsjávarsviðs Vinnslustöðvarinnar drapst á aðalvél skipsins þegar þeir voru að sigla inn innsiglinguna. Áhöfnin náði að kasta akkeri og það í raun bjargar því að skipið fer ekki upp í garðinn.

,,Þeir bregðast í raun hárrétt við. Skipið var á lítilli ferð þegar þetta gerist. Eftir að aðstoð barst frá Lóðsinum og frá Björgunarfélaginu var ákveðið að sleppa akkerinu og keðjunni. Það verður svo kafað eftir því þegar tækifæri gefst og búið er að tryggja að öruggt sé að hífa það af hafsbotni, segir Sindri í samtali við Eyjafréttir.

Þá segir í tilkynningu frá Landsbjörgu að taug hafi verið komið aftur úr Huginn í Lóðsinn sem togaði í hann á meðan Þór lagðist með stefnið á síðu Hugins aftarlega til að ýta á hann til að snúa skipinu. Þessar aðgerðir gengu fljótt og vel.

Fyrirsögn var breytt eftir að ljóst var að skipið tók ekki niðri.