�?að er gömul trú að veður að breytist þegar hundadagar byrja og haldist nokkuð svipað yfir hundadagana alla eða til 23. ágúst. Hvort hundadagarnir byrji 13. júlí eða 23. júlí er hinsvegar breytilegt eða skiptar skoðanir um. Samkvæmt veðurspá hjá yr.no hættir að rigna 23. júlí og engin rigning næsta dagana, og helgin þar á eftir á að vera sólrík. Er þá ekki best að segja að hundadagarnir byrji 23. júlí. Í því felst allavega von um betri tíð.

Á vefnum Wikipedia segir að hundadagar séu tiltekið skeið sumars um heitasta tímann, nú talið frá 13. júlí (Margrétarmessu) til 23. ágúst í íslenska almanakinu (6 vikur). Nafnið mun komið frá Rómverjum, er sóttu hugmyndina til Forn-Grikkja. Grikkir settu sumarhitana í samband við hundastjörnuna (Síríus), sem um þetta leyti árs fór að sjást á morgunhimninum. Bæði hérlendis og erlendis hefur nokkuð verið á reiki hvenær hundadagatímabilið teldist byrja og hve lengi það stæði.

Grikkir munu hafa tekið eftir því að Síríus birtist þegar sól gekk í ljónsmerki, og með hliðsjón af því eru hundadagar stundum reiknaðir frá 23. júlí til 23. ágúst. Var það t. d. gert í íslenska almanakinu fram til 1924 og sömu reglu er enn fylgt í danska almanakinu og því norska. Hjá Íslendingum er hundadaganafnið tengt minningunni um Jörund hundadagakonung sem tók sér völd á Íslandi 25. júní 1809, en var hrakinn frá völdum 22. ágúst sama ár.