ÍBV tekur í dag á móti Val í Pepsídeild karla en leikurinn fer fram á Hásteinsvelli og hefst klukkan 17:00. Eyjamenn hafa farið afleitlega af stað í deildinni, eru neðstir með aðeins tvö stig eftir sex leiki og hafa m.a. tapað öllum þremur heimaleikjum sínum í sumar í deildinni. Fjórði heimaleikurinn er semsagt í dag en Eyjamenn hafa aðeins verið að rétta úr kútnum í síðustu tveimur leikjum, unnu 1. deildarlið Hauka í bikarnum og gerðu svo 1:1 jafntefli gegn �?ór norður á Akureyri. En betur má ef duga skal og ef liðið ætlar sér að halda sig frá fallsvæðinu í sumar, þá má liðið ekki við því að tapa fleiri heimaleikjum.

Magnús Gylfson, sem tvívegis hefur þjálfað ÍBV, hefur farið vel af stað með Valsmenn en Valur er í fjórða sæti með 11 stig, þrjá sigra, tvö jafntefli og aðeins eitt tap. Leikmenn ÍBV verða því að sýna sparihliðarnar í dag, ætli þeir sér að ná í sinn fyrsta sigur í deildinni þetta sumarið. Dean Martin, aðstoðarþjálfari og leikmaður ÍBV verður ekki með í dag þar sem hann fékk að líta rauða spjaldið í leiknum gegn �?ór og munar um minna, enda hefur Dean verið einn af skárri leikmönnum liðsins.