Meira en 7.000 tonn af hráefni hafa verið unnin til söltunar hjá Vinnslustöðinni það sem af er ári. Það er meira en var unnið á öllu síðasta ári. Þetta kemur fram í færslu á Facebook-síðu fyrirtækisins.

Áfanganum var fagnað með tertu með morgunkaffinu síðastliðinn föstudag. Langstærstur hluti hráefnisins er þorskur en einnig hefur verið unnið töluvert af ufsa.

Samkvæmt færslunni á styttra sumarstopp í vinnslunni sinn þátt í auknu magni. Þá hafa fjárfestingar Vinnslustöðvarinnar í Portúgal skapað fjölbreyttari framleiðslu- og sölumöguleika í saltfiski. Nú er meðal annars unnið að undirbúningi fyrir mikilvæga jólasölu þar í landi.

Síldarvertíðin er einnig hafin, en fyrsta síldarlöndunin var úr Gullbergi VE í lok síðustu viku. Vinnslustöðin boðar nánari umfjöllun um vertíðina síðar.