Karlalið ÍBV leikur mikilvægan leik klukkan 18:00 í dag í Árbænum þegar Eyjamenn sækja Fylki heim. Fyrir leikinn er ÍBV í 8. sæti með 13 stig en Fylkir er í 10. sæti með 11 stig. Sigur myndi því þýða að ÍBV kæmist í þægilega fjarlægð frá fallbaráttunni og sama gildir auðvitað um Fylki, sem þarf nauðsynlega á stigum að halda. Gengi liðanna undanfarið er ólíkt því ÍBV hefur unnið þrjá af síðustu fjórum leikjum sínum í deildinni á meðan Fylkir hefur aðeins unnið einn af síðustu tíu leikjum sínum og gert tvö jafntefli. Hins vegar vann Fylkir fyrri viðureign liðanna í Eyjum 1:3, eftir að ÍBV hafði komist yfir.