Umhverfis- og skipulagsráð Vestmannaeyja tók fyrir á síðasta fundi ráðsins umsókn frá Garðari Heiðari Eyjólfssyni og Eygló Egilsdóttur um uppbyggingu íþróttamannvirkis á svæði sem stendur milli bílastæðis Íþróttamiðstöðvar og Illugagötu og tilheyrir landnotkunarreit íþrótta- og útivistarsvæðis við Hástein.

Erindið var tekið fyrir á 311 fundi fjölskyldu- og tómstundaráðs sem bókaði eftirfarandi niðurstöðu: Ráðið tekur jákvætt í erindið enda fellur það vel að íþróttastefnu sveitarfélagsins og mun ekki hafa truflandi áhrif á umhverfi og starfsemi Íþróttamiðstöðvarinnar.

Í afgreiðslu skipulagsráðs segir að ráðið sé hlynnt erindinu og var skipulagsfulltrúa falið að vinna málið áfram með bréfritara. Ráðið óskar eftir afstöðu bæjarráðs með vísan til vinnureglna við úthlutun byggingarlóða hjá Vestmannaeyjabæ.

Margvísleg þjónusta á sviði heilsueflingar

Fram kemur í umsókninni að húsnæðið sé á tveimur hæðum með 500m2 grunnflöt sem kemur til með að geta hýst margvíslega þjónustu á sviði heilsueflingar. Þar er átt við: meiðslaforvörn, meðhöndlun, endurheimt og hágæða þjálfun fyrir íþróttafólk og almenning á öllum aldri.

Á neðri hæð hússins er gert ráð fyrir stórum sal fyrir alhliða hóptímaþjálfun, þar verða laus lóð og önnur laus áhöld til þjálfunar. Í þessum sal væri líka hægt að bjóða upp á einkaþjálfun. Á hæðinni yrðu einnig tveir rúmgóður búningsklefar, stórt anddyri, salernisaðstaða og stigarými upp á efri hæð.

Á efri hæð er áætlað að verði tveir rúmgóðir salir fyrir einfaldari hóptíma. Einnig er gert ráð fyrir fimm meðferðarherbergjum, þar á meðal sérhæfðu herbergi fyrir hnykkjara, ásamt þremur skrifstofum, salernisaðstöðu og móttöku. Gert er ráð fyrir hjólastólaaðgengi inn á báðar hæðir en töluverður hæðamismunur er í landslagi sem einfaldar þá framkvæmd fyrir efri hæðina til muna.

Hér að neðan má sjá mynddband sem sýnir húsnæðið í þrívídd í landslaginu.