Knattspyrnuþjálfarinn og Eyjamaðurinn Óskar Elías Zoega Óskarsson hefur verið ráðinn aðstoðarþjálfari meistaraflokks karla í fótbolta. Hann mun því vera Þorláki Árnasyni innan handar og mynda þjálfarateymi með honum og Kristian Barbuscak markmannsþjálfara. Þetta kemur fram í tilkynningu á vefsíðu ÍBV.

Óskar er 29 ára þjálfari sem lék upp alla yngri flokkana með ÍBV, hann lék fyrsta leik sinn í meistaraflokki fyrir ÍBV 15 ára gamall og hefur samtals leikið 100 leiki í efstu og næstefstu deild. Hann hefur einnig leikið mikið með KFS, ríflega 50 leiki. Síðustu tvö tímabil hefur Óskar einbeitt sér meira að þjálfun og leikið með KFS samhliða því. Samningur hans við knattspyrnudeildina er til tveggja ára.

Það verður spennandi að fylgjast með Óskari í þessu hlutverki en hann þjálfar einnig hjá yngri flokkum félagsins. Knattspyrnuráð hlakkar til samstarfsins og óskar Óskari góðs gengis.