Ritstjórn
Fram kemur í frétt Viðskiptablaðsins í gær að Vestmannaeyjar séu meðal þeirra staða sem norski fóðurframleiðandinn Skretting hefur til skoðunar. Eru Vestmannaeyjar meðal þriggja staða á Íslandi sem norski fiskafóðurrisinn Skretting skoðar fyrir mögulega uppbyggingu fóðurverksmiðju. Þetta kom fram í frétt Viðskiptablaðsins í gær, sem byggir á umfjöllun IntraFish.
Samkvæmt fréttinni vinnur Skretting að undirbúningi fyrir áframhaldandi vöxt fiskeldis á Íslandi og er meðal annars að kanna möguleika á innlendri fóðurframleiðslu. Fyrirtækið hefur þó ekki tekið neina endanlega ákvörðun um staðsetningu eða framkvæmdir.
„Sem hluti af því erum við einnig að skoða mögulega staði fyrir fóðurframleiðslu í framtíðinni,“ sagði Håvard Walde, framkvæmdastjóri alþjóðlegrar laxastarfsemi Skretting, í samtali við IntraFish.
Vestmannaeyjar taldar vel í stakk búnar
Í frétt Viðskiptablaðsins er haft eftir Írisi Róbertsdóttur, bæjarstjóra Vestmannaeyja að Skretting hafi þrengt valið niður í þrjá staði. Hún telur Vestmannaeyjar hafa marga kosti þegar kemur að slíkri uppbyggingu.
Þar nefnir hún góða hafnaraðstöðu, aðgengi að landi til uppbyggingar, nálægð við hráefni og sterka stöðu sjávarútvegs í Eyjum. Þá bendir hún á að unnið sé að frekari uppbyggingu hafnarinnviða sem gæti styrkt samkeppnisstöðu Eyjanna enn frekar.
Íris telur jafnframt að markaðurinn fyrir fiskafóður á Íslandi sé orðinn það stór að ef Skretting ákveði að ráðast ekki í verkefnið gæti annað fyrirtæki komið inn á markaðinn.
Mikilvæg fjárfesting fyrir Eyjar
Hallgrímur Steinsson, rekstrarstjóri hjá Laxey segir í viðtali við IntraFish að fóðurverksmiðja í Vestmannaeyjum myndi hafa veruleg jákvæð áhrif á atvinnulíf og samfélag. „Þetta myndi skipta okkur miklu máli og styðja við uppbyggingu samfélagsins hér í Eyjum,“ segir Hallgrímur.
Laxey stefnir að framleiðslu um 5.000 tonna af laxi á þessu ári og á sama tíma heldur framleiðsla í íslensku fiskeldi áfram að aukast. Hallgrímur bendir á að þótt nægt framboð sé af fóðri í dag muni flutningar á sívaxandi magni til Íslands verða sífellt stærra verkefni eftir því sem greinin vex.
Skretting hefur áður lýst því yfir að Ísland geti orðið eitt af stærstu laxeldislöndum heims ef uppbygging heldur áfram með sama hraða. Með vexti bæði landeldis og sjókvíaeldis virðast forsendur fyrir innlendri fóðurframleiðslu því styrkjast með hverju árinu.
