Vorið 2012 var hleypt af stokkunum þróunarverkefni, íþróttaakademíu við Grunnskóla Vestmannaeyja að fyrirmynd íþróttaakademíu Framhaldsskólans í Vestmannaeyjum. Vestmannaeyjabær og ÍBV-Íþróttafélag gerðu í kjölfarið með sér samstarfssamning vegna verkefnisins.

Hugmyndin með verkefninu var fyrst og fremst að bæta samskipti og auka samstarf GRV og ÍBV, efla forvarnir, draga úr brottfalli úr íþróttum á viðkvæmum aldri, efla áhuga, metnað og árangur nemenda í námi og íþróttum, fylgja skóla-, íþrótta- og æskulýðsstefnu sveitarfélagsins og auka þjónustu við afreksfólk.

Verkefnið felst í því að allir nemendur í 9. og 10. bekk með íþróttir sem valgrein hafa möguleika á því að ganga í íþróttaakademíuna. Nemendur undirrita lífsstílssamning sem felst í því að neyta engra vímuefna, leggja sig allan fram í sínu námi, vera öðrum fyrirmynd og hlýta ströngum mætingarreglum á æfingar og fyrirlestra. Nemendurnir mæta eldsnemma á æfingar, bæði tækni- og styrktaræfingar og sitja fyrirlestra sem nýtast þeim vel í íþróttum og námi.

�?etta verkefni er í stöðugri þróun og hefur skipulaginu m.a. verið breytt nokkuð til að draga úr álagi á nemendurnar. Með þessu fyrirkomulagi hefur samvinna GRV og ÍBV íþróttafélags aukist til muna og gagnkvæmur skilningur ríkir þar sem megináherslan er fyrst og fremst á námið en nemendum er gert kleift að sinna íþrótt sinni af fullum krafti.

Árangurinn hefur svo sannarlega ekki látið á sér standa, vímuefnaneysla í GRV og FÍV er með því minnsta sem mælist á landinu og dregið hefur úr reykingum. Frábær árangur í íþróttunum talar sínu máli, bikar- og Íslandsmeistaratitlar, landsliðsfólki fer fjölgandi o.s.frv. Allt byggir þetta auðvitað á miklum metnaði og öflugu starfi kennara skólanna, þjálfara ÍBV og síðast en alls ekki síst nemendanna sjálfra sem eru uppfullir af metnaði, samviskusemi og eru öflugar fyrirmyndir.