Verðið sem Glitnir greiðir fyrir um 40% hlut í Tryggingamiðstöðinni er um 15% hærra en lokagengi í Kauphöllinni í gær. Eins og fram kom í fréttum fyrr í dag hefur Glitnir keypt tæplega 40% hlut í Tryggingamiðstöðinni fyrir um 20 miljarða króna.

Samkvæmt tilkynningu frá Glitni stendur til að selja hlutinn áfram til annarra fjárfesta. Glitnir keypti hlutinn, m.a. af stærsta hluthafanum, á genginu 46,5. Karl Kári Másson, sérfræðingur hjá greiningardeild Landsbankans, segir verðið hátt.

Annar stærsti hluthafinn, Kjarrhólmi ehf., sem að stórum hluta er í eigu FL Group, keypti í apríl sl. ríflega þriðjungshlut í félaginu á genginu 38. Gengi bréfa í félaginu hefur því hækkað um rúmlega fimmtung síðan þá. Karl Kári segir erfitt að spá fyrir um hvaða fjárfestar hafi áhuga á tryggingafélagi og hvort þeir eru innlendir eða erlendir.