Glitnir hefur samið um kaup á 39,8% hlut í Tryggingamiðstöðinni hf. (TM). Seljendur eru félög í eigu Guðbjargar M. Matthíasdóttur, Sigríðar E. Zoéga, Geirs G. Zoéga auk aðilar þeim tengdum. Eignarhaldsfélagið Kristinn ehf. sem er í eigu Guðbjargar M. Matthíasdóttur mun eiga 9% eignarhlut í TM eftir viðskiptin. Gengi bréfa TM í viðskiptunum er 46,5 krónur á hlut og nemur virði eignarhlutarins því um 20 milljörðum króna. Glitnir mun greiða 60% kaupverðsins með reiðufé og 40% með bréfum í Glitni á genginu 28,45 sem var dagslokaverð á bréfum bankans þann 4. september 2007.

Seljendur hafa skuldbundið sig til að eiga 90% þeirra Glitnis hluta sem þeir fengu sem greiðslu í viðskiptunum í að minnsta eitt ár, að því er segir í tilkynningu.

Markaðsvirði hlutanna nemur 7,2 milljörðum króna. Markmið Glitnis er að selja alla hina keyptu hluti í TM eða stærstan hluta þeirra til ýmissa fjárfesta. Viðræður þar að lútandi eru hafnar og greint verður frá niðurstöðum þeirra um leið og þær liggja fyrir.