Árleg úthlutun úr Styrktar- og menningarsjóði Sparisjóðs Vestmannaeyja fór fram í gærdag. Styrktar- og menningarsjóðurinn var stofnaður var til minningar um Þorstein Þ. Víglundsson fyrrverandi sparisjóðsstjóra og er þetta í tuttugasta skiptið sem úthlutað er úr sjóðnum, en fyrsta úthlutunin var á Þorláksmessu árið 1988.

Að þessu sinni fengu eftirfarandi styrki:

Gaujulundur
Það var sumarið 1988 sem hjónin Erlendur Stefánsson og Guðfinna Ólafsdóttir hófu af mikilli eljusemi uppgræðslu og ræktun í dalverpi eða lundi á Nýja hrauninu í Vestmannaeyjum aðeins 15 árum eftir jarðeldana 1973.  Það eru því 20 ár næsta sumar síðan uppgræðslan hófst, en í upphafi var þar enginn jarðvegur annar en tómur vikur.  Með árunum dafnaði lundurinn og fékk nafnið Gaujulundur eftir öðrum frumherjanum.  Lundurinn hefur haft mikið aðdráttarafl fyrir ferðamenn sem og Eyjamenn og á síðasta sumri skrifuðu sig um 3000 manns í gestabókina en margir komu án þess að kvitta fyrir.  Erlendur lést í ágúst á þessu ári.  S.l. sumar tóku Sólbakkablóm, sem hjónin Jónas Þór Sigurbjörnsson og Hrefna Ósk Erlingsdóttir reka, við umhirðu og áframhaldandi uppbyggingu Gaujulundar.  Sparisjóðurinn vill leggja sitt af mörkum til að viðhalda því uppbyggingarstarfi sem frumherjarnir lögðu grunn að í virðingarskini við þá.  Auk þess að stuðla að áframhaldandi uppbyggingu m.a. til að bæta aðgengi að Gaujulundi.

Skólalúðrasveit Vestmannaeyja
Skólalúðrasveit Vestmannaeyja sem starfar í dag var stofnuð í febrúar á árinu 1978 og verður því 30 ára á næsta ári.  Áður hafði starfað skólalúðrasveit sem stofnuð var 1956, sú sveit tengdist Gagnfræðaskólanum.  Skólalúðrasveitin er alfarið skipuð nemendum Tónlistaskóla Vestmannaeyja og er hluti af starfi skólans.  Allan þennan tíma hefur hún haldið úti kröftugu starfi.  Frá stofnun sveitarinnar var hún undir stjórn Hjálmars Guðnasonar sem lést langt fyrir aldur fram í janúar 2006.  Þá tóku Eggert Björgvinsson og Jarl Sigurgeirsson við sem stjórnendur sveitarinnar, en Eggert hafði áður starfað sem aðstoðamaður Hjálmars.  Öflugt foreldrafélag hefur ávalt starfað með sveitinni og staðið fyrir söfnunum m.a. í ferðasjóð og til búningakaupa.  Á næsta ári stefnir Skólalúðrasveitin á ferð til Danmerkur en áður hefur sveitin farið þrisvar erlendis.

Óskar Sigurðsson, vitavörður
Óskar Sigurðsson, vitavörður og veðurathugunarmaður varð 70 ára í nóvember á þessu ári.  Hann er fæddur og uppalinn í Stórhöfða.  Veðurathuganir í Stórhöfða hófust 1921 en viti var fyrst byggður þar árið 1906.  Óskar byrjaði árið 1952 að aðstoða föður sinn við veðurathuganir og tók formlega við árið 1965.  Hann er þriðji ættliðurinn sem sinnir þessu starfi.  Óskar hefur um áratugaskeið sinnt fuglamerkingum og hefur merkt yfir 100 þúsund lunda auk annarra fugla, sem mun vera heimsmet í merkingu sjófugla.  Hann hefur stunda ýmis önnur rannsókna- og vísindastörf m.a. tekið loftsýni fyrir bandaríska vísindastofnun.
Árið 1997 var Óskar sæmdur riddarakrossi hinnar íslensku Fálkaorðu fyrir störf í þágu fuglarannsókna.  Óskar hefur auk þessa hlotið markvíslegar viðurkenningar fyrir störf sín m.a. frá bandarískri vísindastofnun.  Sparisjóðurinn vill heiðra Óskar fyrir ævistarf hans við veðurathuganir og önnur vísindastörf í Vestmannaeyjum.

Bókasafn Vestmannaeyja
Fyrstu bækur eftir Vestmannaeying voru prentaðar árin 1652 og 1662.  Um er að ræða Genesesarsálma og Davíðssálmaútleggingar sr. Jóns Þorsteinssonar píslarvotts (f. 1570? – d. 1627).  Bækur þessar eru vitaskuld orðnar svo fágætar að engin von er um að eignast af þeim eintak lengur.  Örfá eintök eru varðveitt í veröldinni, þar af eitt af hvorri bók í Landsbókasafni Íslands.  Samið hefur verið við Landsbókasafn um að ljósmynda bækurnar í upprunalegri stærð og búa á þann hátt til eftirgerð þessara tveggja bóka.  Kári Bjarnason, forstöðumaður Bókasafnsins hefur ritað upp báðar þessar bækur á nútímaíslensku, en þær eru prentaðar með gotnesku letri og samið orðskýringar við þar sem þörf er á.  Bækurnar verða eign Vestmannaeyjabæjar og vistaðar í Bókasafninu.

Menningarmiðstöð fyrir ungt fólk – Vosbúð
Í mars á þessu ári tók Menningar- og tómstundaráð Vestmannaeyja ákvörðun um að koma upp menningarmiðstöð fyrir ungt fólk á aldrinum 16 – 25 ára í Vestmannaeyjum.  Starfsemin sem er að Strandvegi 65 – Vosbúð opnaði fyrr í vetur.  Ungmennin skipa húsráð og hafa sjálf veg og vanda að skipulagningu húsnæðisins sem nú er orðið hið glæsilegasta.  Starfsemin er margs konar, t.d. kaffihús, þráðlaust internet, billjardborð, risasjónvarp o.fl.
Markmið Vosbúðar er þríþætt: að bjóða upp á heilbrigðan valkost í afþreyingu ungs fólks í Vestmannaeyjum, að aðstoða ungt fólk við að hrinda hugmyndum sínum í framkvæmd og að vera leiðandi í jákvæðu starfi ungs fólks í Vestmannaeyjum í samstarfi við hina ýmsu aðila.  Starfsemin hefur farið vel af stað en krakkana vantar nauðsynlega ýmsan búnað til að reka menningarmiðstöðina.  Sparisjóðurinn vill með framlagi sínu koma að þessu uppbyggingarstarfi með krökkunum.

Samstarfssamningar vi Taflfélag Vestmannaeyja og golfklúbbinn
Við sama tækifæri var skrifað undir samstarfssamning við Taflfélag Vestmannaeyja og Golfklúbb Vestmannaeyja. Golfklúbburinn fékk þriggja ára samning og Taflfélagið tveggja ára samstarfssamning. Sparisjóðurinn og bæði þessi félög hafa átt í farsælu samstarfi um mörg undanfarin ár og eru þessir samningar staðfesting á áframhaldandi samstarfi.  Bæði Golfklúbburinn og Taflfélagið eru einir af burðarásum íþrótta- og æskulýðsstarfs í Vestmannaeyjum.  Sparisjóðurinn metur það af verðleikum og eru samningarnir sem eru undirritaðir núna áþreifanlegur vitnisburður um aðkomu Sparisjóðsins að íþrótta- og æskulýðsstarfi félaganna.

Myndagallerý frá undirritun samstarfssamninga og afhendingar styrkja úr Styrktar- og menningarsjóði má sjá hér