Jólin í Vestmannaeyjum verða degi styttri en jól annarra landsmanna. Bæjaryfirvöld og ÍBV hafa ákveðið að færa þrettándann yfir á laugardaginn 5. janúar, þar sem heppilegra er að halda hátíð þann dag.Þessi háttur verður hafður á næstu tvö árin. Það þýðir að þrettándinn verður laugardaginn 3. janúar að ári. Jólin styttast því um þrjá daga árið 2009.

Þrettándanefnd ÍBV samþykkti tillöguna á fundi sínum í vikunni, en fundinn sat einnig Elliði Vignisson bæjarstjóri, að því er kemur fram á vefnum sudurland.is. Lofuðu bæjaryfirvöld frekari aðkomu að þrettándagleðinni ef hún yrði haldin á laugardegi.

Þrettándagleðin hefur verið stór viðburður í jólahaldinu í Vestmannaeyjum í rúmlega hálfa öld. Þá kveðja jólasveinarnir, Grýla og Leppalúði íbúa Heimaeyjar með virktum.