Magnús Kristinsson, útgerðarmaður, kom í dag til Vestmannaeyja á nýjum farkosti, þyrlu sem hann keypti í Bandaríkjunum. Segist hann með því vera að leysa eigin samgöngumál þar sem pólitíkin hefi brugðist í þeim efnum.

Magnús er mjög háður samgöngum vegna starfa sinna. Segist hann hafa verið búinn að gefast upp á núverandi ástandi og ekki sé bjartara framundan. „Ástandið eins og það er núna er fyrir neðan allar hellur og ekki annað að sjá en að stjórnmálamennirnir ætli að svíkja allt sem þeir sögðu fyrir kosningar. Það er búið að taka bæði nýjan Herjólf og jarðgöng út af borðinu og nú á að fara í einhvern leikaraskap í Bakkafjöru sem aldrei verður að veruleika,” sagði Magnús sem hafði stuttan stans í Eyjum.

Frá Eyjum flaug hann í bústað sinn í Biskupstungum og þaðan til Reykjavíkur eftir að hafa fengið sér kaffi.