Sundlaugargestum og starfsfólki sundlaugarinnar á Hellu tókst að bjarga lítilli telpu sem fannst meðvitundarlaus á botni sundlaugarinnar í dag. Lögreglan þakkar það snarræði og réttum viðbrögðum starfsfólksins að það tókst að endurlífga stúlkuna. Stúlkan er á fimmta aldursári. Sundlaugargestur tók eftir því að hún lá á botni laugarinnar og kom henni upp úr. Starfsfólk sundlaugarinnar kom strax út og hóf endurlífgun með því að blása í hana og hnoða. Bar það árangur og var stúlkan komin til meðvitundar áður en sjúkralið og lögregla kom á vettvang um klukkan fjögur.