Bæjarbúar hafa verið duglegir við hreinsun á húsum og görðum eftir öskufallið um síðustu helgi. Enn er þó mikil aska á götum og víðs vegar um bæinn sem gerir það að verkum að svifryksmengun er mikil um leið og hreyfir vind. „Við erum með öll okkar tæki á fullu,“ sagði Ólafur Snorrason framkvæmdastjóri umhverfis- og framkvæmdasviðs á þriðjudag. „Við erum með einn sóparabíl, þrír vörubílar eru á ferðinni, einn frá Áhaldahúsi og tveir aðrir sem hirða upp kör og poka með ösku og svo eru þrjár gröfur að skafa upp af köntum við götur. Slökkvi­lið bæjarins og flugvallar eru við hreinsun við skóla, sjúkrahúsið og fleiri stofnanir.“