Eyjamenn unnu sannfærandi sigur á Selfyssingum í kvöld þegar liðin áttust við á Hásteinsvelli. Það tók Eyjamenn ekki nema fjörtíu sekúndur sléttar að ná forystunni en það gerði refurinn Tryggvi Guðmundsson þegar hann fylgdi eftir góðri rispu Þórarins Inga Valdimarssonar. Eyjamenn höfðu algjöra yfirburði í fyrri hálfleik en tókst þrátt fyrir það ekki að bæta við mörkum fyrr en í síðari hálfleik. Sigur Eyjamanna er hins vegar síst of stór miðað við gang leiksins í heild.