Fiska- og Náttúrugripasafni Vestmannaeyja barst í dag Tunglfiskur. Áhöfnin á Kap VE dró fiskinn úr hafinu um það bil 60 sjómílur út af Reykjanesi en Kap var þar við Makrílveiðar. Reynt verður að stoppa fiskinn upp en fyrir er á safninu eitt eintak. Tunglfiskur er þyngsti beinfiskur jarðar og getur orðið yfir tvö tonn að þyngd og rúmir þrír metrar að lengd samkvæmt alfræðisíðunni Wikipedia.org. Algeng stærð við Ísland er hins vegar 150-250 sentímetrar en fiskurinn sem kom til Eyja er líklega rúmir 100 sentímetrar að lengd.