Um hádegi í dag kom til hafnar í Eyjum flutningaskipið Longdawn. Grunur er um að skipið hafi siglt á strandveiðibát sem sökk norðvestur af Garðskaga í nótt.

Í tilkynningu frá Landhelgisgæslunni segir að mannbjörg hafi orðið þegar strandveiðibátur sökk norðvestur af Garðskaga á þriðja tímanum í nótt. Stjórnstöð Landhelgisgæslunnar barst neyðarkall frá skipstjóra annars strandveiðibáts klukkan 02:42 þess efnis að bátur í grenndinni væri að sökkva um 6 sjómílur norðvestur af Garðskagavita. Þyrlusveit Landhelgisgæslunnar var þegar í stað kölluð út á hæsta forgangi ásamt sjóbjörgunarsveitum Slysavarnafélagsins Landsbjargar á Suðurnesjum. Þá voru nálæg fiskiskip og bátar beðin um að halda á staðinn.

Skömmu eftir að neyðarkallið barst Landhelgisgæslunni hafði tilkynnandi aftur samband og tjáði varðstjórum í stjórnstöð að hann væri búinn að bjarga manninum úr sjónum en bátsverjanum tókst að komast í björgunargalla áður en bátur hans sökk. Maðurinn var kaldur eftir veruna í sjónum og var ákveðið að sjúkrabíll biði hans á bryggjunni á Sandgerði. Sá sem bjargaði manninum sigldi með hann þangað. Báturinn marar í hálfu kafi og munu sjóbjörgunarsveitir Landsbjargar freista þess að draga hann til hafnar.

Landhelgisgæslan vill koma á framfæri sérstökum þökkum til skipstjóra strandveiðibátsins sem sýndi mikið snarræði við björgun mannsins og einnig til annarra viðbragðaðila sem brugðust við með skjótum og fumlausum hætti.

Fulltrúar Samgöngustofu, Gæslunnar og rannsóknarnefndar samgönguslysa til Eyja

Haft er eftir Ásgeiri Erlendssyni, upplýsingafulltrúa Landhelgisgæslunnar á vef Fiskifrétta að þegar Landhelgisgæslan hafi farið að skoða feril skipanna í nótt kom í ljós að flutningaskip og þessi strandveiðibátur voru á sömu slóðum á sama tíma. Vegna þess ákvað Landhelgisgæslan að beina þessu skipi til hafnar í Vestmannaeyjum til skýrslutöku.

Segir Ásgeir að lögreglan í Eyjum muni taka skýrslu af skipstjóra flutningaskipsins „Fulltrúar Samgöngustofu, Gæslunnar og rannsóknarnefndar samgönguslysa munu sömuleiðis fara til Eyja,“ segir Ásgeir.

Lögreglan á Suðurnesjum muni síðan fara með rannsókn málsins. Þetta sé eitt af því sem sé til skoðunar. Óskar Pétur Friðriksson smellti meðfylgjandi myndum við komu skipsins til Eyja í hádeginu.