Karlalið ÍBV í fótbolta tók á móti FH á Hásteinsvelli í fyrstu umferð Bestu deildar karla í dag. Leiknum lauk með 1-1 jafntefli og má segja að þetta hafi verið leikur tveggja hálfleika.

Eyjamenn byrjuðu leikinn betur og voru með yfirhöndina í fyrri hálfleik. Eftir um 30 mínútna leik hefði ÍBV átt að fá vítaspyrnu þegar Bjarki Björn Gunnarsson var tekinn niður inn í teig en dómarinn dæmdi ekkert. Á 35. mínútu leiksins dró hins vegar til tíðinda þegar Alex Freyr Hilmarsson kom boltanum fyrir markið og Viggó Valgeirsson þurfti ekki að gera annað en að stýra boltanum í netið. Viggó að skora sitt fyrsta mark í efstu deild. Eyjamenn leiddu 1-0 í hálfleik.

FHingar komu töluvert sterkari til leiks í síðari hálfleik. Á 73. mínútur leiksins fengu Eyjamenn dæmda á sig vítaspyrnu. Kjartan Kári Halldórsson steig á punktinn en Marcel Zapytowski markvörður ÍBV gerði vel og varði frá honum. Sjö mínútum síðar gerðist Milan Jezdemirovic sekur um slæm mistök þegar hann átti slaka sendingu til baka á Marcel. Boltinn endaði fyrir utan teiginn og Kári Kristjánsson setti boltann í autt markið og jafnaði í 1-1. Síðustu mínútur leiksins voru nokkuð líflegar en hvorugt liðið náði að knýja fram sigur.

Næsti leikur ÍBV er gegn Val á Hlíðarenda, föstudaginn 17. apríl kl. 18:00. 

Fyrsta umferð Bestu deildarinnar klárast í dag:

Föstudagur 10. apríl  Víkingur Reykjavík 1 – 1 Breiðablik

Sunnudagur kl. 13:00 ÍBV 1 – 1 FH

Sunnudagur kl. 17:00 KA – Stjarnan

Sunnudagur kl. 17:00 KR – Keflavík

Sunnudagur kl. 17:00 Valur – Þór Akureyri

Sunnudagur kl. 19:30 Fram – ÍA