Eyjamaðurinn Arnar Pétursson stýrði íslenska kvennalandsliðinu í handbolta til sigurs gegn Portúgal í riðli fjögur í undankeppni EM 2026. Leiknum lauk með stórsigri Íslands og urðu lokatölur 32-24. Ísland tryggði sér með sigrinum sæti á Evrópumótinu sem fram í desember á þessu ári, en fyrir leikinn var vitað að þetta væri hreinn úrslitaleikur um sæti á mótinu. 

Portúgal var með yfirhöndina í fyrri hálfleik en íslenska liðið átti mjög góðan kafla undir lok hálfleiksins, þegar þær breyttu um vörn. Þær náðu þá þriggja marka forystu, 15-12, eftir að hafa verið tveimur mörkum undir. Ísland leiddi með þremur mörkum í hálfleik.  

Íslenska liðið hélt uppteknum hætti í síðari hálfleik og voru töluvert sterkari aðilinn. Þær unnu að lokum átta marka sigur, 32-24. 

Eyjastelpurnar létu til sín taka

Eyjakonurnar Díana Dögg Magnúsdóttir, Elísa Elíasdóttir, og Sandra Erlingsdóttir voru allar á sínum stað í liðinu, ásamt Andreu Jacobsen, tilvonandi leikmanni ÍBV. Sandra skoraði fjögur mörk, Elísa Elíasdóttir tvö, Díana Dögg eitt og Andrea Jacobsen eitt.

Ísland hafnaði í þriðja sæti riðilsins með fjögur stig og fer áfram sem eitt af fjórum liðum með besta árangur í þriðja sæti. Þetta er fjórða stórmótið í röð sem Ísland tekur þátt í.