Blíðskaparveður og fjölbreytt dagskrá settu svip sinn á annan dag Goslokahátíðar í Vestmannaeyjum í gær. Um allan bæ var líf og fjör þar sem heimamenn og gestir nutu listasýninga, tónlistar, markaða og annarra viðburða sem boðið var upp á frá morgni og fram á kvöld.

Ljósmyndari Eyjafrétta heimsótti þrettán viðburði víðs vegar um Vestmannaeyjar yfir daginn. Afraksturinn er vegleg myndasyrpa með 100 myndum auk nokkurra myndbanda sem fanga mannlífið, listina, tónlistina og þá einstöku stemningu sem ríkti á öðrum degi Goslokahátíðar. Meðal annars var komið við í Gallerý 24 þar sem Merkikerti var með sölusýningu, á sýningunni Draumur í DOSE Prýði, á Rakarastofunni, í jóga á Stakkó undir stjórn Láru Skærings, á sýningu í húsi Taflfélags Vestmannaeyja og á útilistasýningunni á Stakkó.

Einnig heimsótti hann Hvíta húsið, Gallerý Skúrinn og Miðbæjarfjörið á Bárugötu þar sem Kiddi Bigfoot sá um tónlistina og skapaði líflega stemningu. Síðdegis voru opnaðar nýjar sýningar, meðal annars sýning Hrafnhildar Kristinsdóttur í Sagnheimum og sýning Árna Vilhjálmssonar, Heldur flatur Heimaklettur og fleiri fletir. Þá opnaði Jóna Kristjánsdóttir myndlistasýningu sína í Gelp-krónni.

Tónlistin fékk svo að njóta sín um kvöldið þegar Guðrún Erlingsdóttir hélt útgáfutónleika í Eldheimum. Hátíðardeginum lauk síðan með tónleikum Mannakorns í Höllinni þar sem um 500 gestir mættu og skemmtu sér fram á kvöld. Meðfylgjandi myndasyrpa gefur innsýn í fjölbreytt mannlíf og góða stemningu sem ríkti víðs vegar um Vestmannaeyjar á föstudegi Goslokahátíðar.