Golfvöllurinn í Vestmannaeyjum hefur komist á lista hins virta breska golftímarits Today’s Golfer yfir 100 ógleymanlegustu golfupplifanir heims. Völlurinn er í 23. sæti listans en Golfklúbbur Brautarholts er í 16. sæti.
Listi Today’s Golfer byggir á mati sérstakra álitsgjafa sem ferðast um heiminn í leit að völlum með svokallaðan „X-faktor“ – völlum sem veita kylfingum ógleymanlega heildarupplifun.
Golfvöllurinn í Vestmannaeyjum er þekktur fyrir einstakt umhverfi þar sem kylfingar leika innan um stórbrotið landslag, með sjávarútsýni og oft við krefjandi íslenskar vindaaðstæður. Náttúran er stór hluti upplifunarinnar og gerir hvern hring ólíkan því sem kylfingar eiga að venjast annars staðar.
Um völl Golfklúbbs Vestmannaeyja hafði dómnefndin þetta að segja:
„Ekkert annað landslag á listanum stenst samanburð, þar sem völlurinn liggur í gíg við sjávarbakkann og myndar risastórt hringleikahús frá náttúrunnar hendi.“
Árangurinn er mikið fagnaðarefni fyrir Golfklúbb Vestmannaeyja og íslenskt golf almennt. Að komast inn á lista alþjóðlegs golftímarits yfir 100 ógleymanlegustu golfupplifanir heims er mikil viðurkenning á sérstöðu og glæsilegu umhverfi vallarins.
