Ég sækist eftir oddvitasæti Sjálfstæðisflokksins í komandi prófkjöri þann 26.mars í Eyjum, þar sem ég tel að kraftar mínir nýtist til að leiða samstilltan hóp fólks til góðra verka fyrir samfélagið.
Ég legg áherslu á ábyrgan rekstur sveitarfélagsins þar sem öflug fjármálastjórn og forgangsröðun skapar tækifæri til að veita okkur íbúum betri þjónustu til framtíðar.
Sveitarfélög þurfa að vera undirbúin fyrir fjölgun eldri borgara og mæta búsetuþörf þeirra. Ég sé fyrir mér byggðarkjarna í nálægð við miðbæinn sem gæti heitið “60mínus”, en það væri skírskotun í íbúðarkjarna þar sem allar íbúðir væru minni en 60m2 og hugsað fyrir fólk sem væri “60plús” í aldri og hefði áhuga á að halda heimili í smærra sniði en áður. Svona lausn myndi um leið skapa tækifæri fyrir ungar fjölskyldur að kaupa þær eignir sem myndu losna við þessa framkvæmd. Bæjarfélagið getur haft forgöngu í svona verkefni og verið leiðandi í að koma því á koppinn. Það felst þá aðallega í skipulagsbreytingum og jafnvel uppkaupum á eignum sem þyrfti að fara í svo verkefnið fengi framgang.
Í Eyjum hefur sjávarútvegurinn verið svo til eina undirstaðan í atvinnusköpun og gjaldeyrisöflun.Það hefur breyst með tilkomu betri samgangna. Með uppbyggingu ferðaþjónustunnar felast mikil sóknarfæri samfélagsins til hagsældar og jákvæðrar byggðaþróunar. Langtímastefnumótun í ferðaþjónustu er mikilvæg með fyrirtækjum í ferðaþjónustu og Vestmannaeyjabæ sem er stór aðili ferðaþjónustunnar með rekstri Herjólfs ohf og Eldheima til dæmis. Huga þarf að umhverfislegum, félagslegum og efnahagslegum þolmörkum. Nauðsynlegt er að uppbygging innviða sé í takt við vöxt greinarinnar.
Öflugt íþróttastarf hefur einkennt okkar samfélag í langan tíma og hefur bæjarfélagið stutt við það myndarlega. Styðja þarf við íþróttir á öllum stigum og iðkendur þurfa hvatningu og stuðning til þátttöku enda hefur íþróttastarf mikið forvarnargildi. Við þurfum að meta vandlega fjárfestingakostina sem eru í betri aðstöðu til íþróttaiðkana og um leið skólastarfi.
Ekki má gefast upp við kröfuna um öflugan rekstur HSU í Eyjum þannig að hægt sé að veita sem flestum nauðsynlega heilbrigðisþjónustu þar með talið fæðingarþjónustu.
Mikilvægt að bætt verði úr afhendingaröryggi á raforku til Eyja. Mikilvægt að koma öðrum sæstreng á framkvæmdaáætlun. Að auki þarf umbætur á flutningsneti uppá landi sem snýr að Eyjum. Bæta þarf stöðu varaafls í Eyjum í samstarfi við stærstu notendur rafmagns. Vatnslögnin til Eyja er komin til ára sinna og þörf á að bæta við lögn til að tryggja vatnsöflun til framtíðar sem getur örugglega sinnt atvinnulífi og grunnþörfum.
Eyþór Harðarson
