Samtök sunnlenskra sveitarfélaga hafa boðið til opins fundar um framtíð háskólanáms á Suðurlandi þriðjudaginn 26. apríl á Selfossi. Háskólastigið hefur stækkað mjög ört á liðnum árum en á það hefur verið bent að menntunarstigið á Suðurlandi sé ennþá tiltölulega lágt. Fulltrúar allra sjö háskóla landsins mæta til fundarins auk þingmanna og fulltrúa mennta- og menningarmálaráðuneytisins. Meðal annars mun Ari Kristinn Jónsson rektor Háskólans í Reykjavík verða með innlegg á fundinum en nú í haust býður skólinn upp á þriggja anna diplómunám í haftengdri nýsköpun í Vestmannaeyjum í samvinnu við Háskólann á Akureyri og öflug sjávarútvegsfyrirtæki.