Sumarið 2019 bauðst mér að setjast í Framkvæmda- og hafnar ráð fyrir hönd Bæjarmálafélagsins fyrir Heimaey, áður hafði ég setið í Hafnarstjórn sem varamaður árin 2006-2010 þá fyrir Sjálfstæðisflokkinn.
Vinnan í ráðinu hefur verið bæði gefandi og fjölbreytt. Samstarfið hefur gengið vel í ráðinu og allir að vinna að heilum hug og höfninni fyrir bestu. Rekstur og fjárhagstaða Vestmannaeyjahafnar er mjög góð þrátt fyrir loðnubrest í tvö ár og brottfall skemmtiferðaskipa vegna Covid.
Verkefnin sem við fulltrúar H-listans höfum lagt áherslu á og unnið að á kjörtímabilinu eru: Samtal við vegagerðina um stórskipakant við Eiði, uppsetning á eftirlitsmyndavélum, kaup á fasteignum til að liðka fyrir skipulagi á Básaskersbryggju, ráðningu hafnarstjóra, hefja undirbúningsvinnu að framtíðarsýn hafnarinnar til næstu 30 ára.
Það sem kom mér mest á óvart þegar ég settist í framkvæmda- og hafnarráð var að ekki væri til stefna eða framtíðarsýn sem unnið væri eftir.
Fyrir all nokkrum árum voru unnar tillögur og útfærslur á stórskipakanti fyrir utan Eiðið en svo virtist sem verkefnið væri stopp eða ekki í neinum farvegi. Því var ákveðið fyrir tveimur árum nánar 22. Apríl 2020 að óska eftir samtali við Vegagerðina um samstarf til að meta framtíðarmöguleika hafnarinnar. Í ljós kom að Vestmannaeyjahöfn átti eftir að vinna töluverða heimavinnu t.d. ljúka við greiningar og skýrslugerð, sú vinna er nú hafin og kominn á skrið undir stjórn hafnarstjóra. Skipafélögin hafa tjáð okkur að áhersla þeirra sé að stækka gámaskip sín og því er deginum ljósara að framtíðarmöguleikar okkar eru að stórskipakantur verði að veruleika fyrir utan Eiði. Út frá kostnaðargreiningum lagði vegagerðin áherslu á að skoða alla möguleika innan hafnar áður en stórskipakantur fyrir utan Eiði yrði valkostur. Farið var í þá vinnu og allir möguleikar skoðaðir innan hafnar með hagsmuna aðilum. Leitað var álits Útvegsbænda, Skipfélaganna og skipstjórum þeirra. Niðurstaðan leiðir okkur ávallt aftur að stórskipakantinum ef við ætlum að horfa til framtíðar, aðrir möguleikar eru skammtímalausnir og takmörkunum háðar.
Með áformum um Landeldi á Laxi mun útflutningur aukast verulega og þarf höfnin að vera tilbúinn undir þá aukningu. Sú aukning getur haft það í för með sér að skipafélögin vildu gjarnan koma oftar við hér í Eyjum og þá með stóru skipin sín sem sigla hér framhjá.
Nú hafa skipin í Vestmannaeyja flotanum verið að stækka og hefur það leitt af sér að upptökumannvirkið við Skipalyftuna er orðið of lítið og tekur aðeins lítinn hluta flotans, við því þurfum við að bregðast.
Við fulltúrar H-listans höfum einsett okkur í framkvæmda og hafnarráði að horfa til framtíðar, hvernig við sjáum höfnina okkar takast á við kröfur nútímans og ekki síður áskoranir framtíðarinnar höfnin er jú lífæð samfélagsins okkar hér í Vestmannaeyjum. Í desember sl. ákvað ráðið að hefja vinnu við mótun á framtíðarsýn hafnarinnar og hefur ráðið átt einn fund og munu starfsmenn og hagsmunaaðilar einnig koma að þeirri vinnu undir stjórn hafnarstjóra.
Helstu áherslur í stefnuskránni hjá okkur í H-listanum þegar kemur að hafnarmálum eru að halda áfram með þá góðu vinnu sem hefur farið fram í tengslum við höfnina, að hefja vinnu í samvinnu við atvinnulífið með þurrkví, stórskipakantur við Eiðið, bæta aðgengi og skipulag á og við Básaskersbryggju fyrir viðskiptavini Herjólfs, undirbúa smíði/kaup á nýjum lóðs, fegrun hafnarinnar og hafnarsvæðisins.
Við viljum að höfnin sé fremst í þjónustu við útgerðir og notendur.
Við munum halda ótrauð áfram ef við fáum til þess umboð að vinna áfram með þau góðu og verðugu verkefni sem við höfum farið af stað með.
Arnar Richardsson, aðalmaður í framkvæmda- og hafnarráði.
Höfundur skipar 7. sæti á lista Fyrir Heimaey í komandi sveitarstjórnarkosningum.
