Á heimsvísu hefur eldi á laxi aukist mikið á undanförnum áratugum. Laxeldi er nær eingöngu stundað í sjókvíum og er það víða umdeilt vegna umhverfisáhrifa. Í sumum löndum hefur hægt á vexti í framleiðslu vegna ýmissa umhverfisþátta og er stöðugt unnið að umhverfisvænni lausnum í laxeldi. Landeldi hefur verið kynnt sem möguleg lausn við helstu umhverfisvandamálum laxeldis en skoðanir hafa verið skiptar um framtíðarmöguleika þeirrar aðferðar.

Í nýrri skýrslu Hafrannsóknastofnunar HV 2022-33 er fjallað um landeldi á laxi sem einkum fer fram í endurnýtingarkerfum (e. recirculating aquaculture systems, RAS) og geta verið af ýmsum gerðum. Eiginleikum endurnýtingarkerfa er almennt lýst, auk þess sem saga tveggja frumkvöðlafyrirtækja í landeldi á laxi er rakin. Einnig er fjallað um greiningar á kostnaði við landeldi á laxi með hliðsjón af kostnaði í sjókvíaeldi. Loks er sjónum beint bæði til Íslands og út í heim og m.a. fjallað um áætlanir fyrirtækja í uppbyggingu landeldis á laxi, kolefnisspor og stóraukinn áhuga á landeldi.

Þetta kemur fram á vef Hafrannsóknarstofnunar og hér má lesa greinina í heild sinni.

En í greininni kemur meðal annars fram í samantekt að landeldi sé töluvert umhverfisvænni kostur en sjóeldi. Staðsetning og nálægð við neytendamarkað hafi þó mikið að segja. Þeta er allt mjög áhugavert í ljósi fyrirætlana ILFS um uppbyggingu eldis í Viðlagafjöru, sem hefur þetta mikilvæga aðgengi að sjó og stutt er í útflutningshöfn.