Slökkvilið Vestmannaeyja var kallað að íbúðarhúsi við Bröttugötu í Vestmannaeyjum rétt fyrir klukkan 3 í nótt. Tilkynnt var um eld í húsinu en mikinn reyk lagði frá því. Slökkvistarf stendur enn yfir en samkvæmt upplýsingum frá slökkviliðinu, bendir allt til þess að eldurinn hafi átt upptök sín í frystiskáp inn af eldhúsi hússins. Einn maður var í húsinu en hann vaknaði við reykskynjara og var húsið orðið fullt af reyk. Hann komst út og gerði viðvart hjá nágranna en hann taldi sig ekki hafa orðið fyrir reykeitrun. Eiginkona mannsins og tvö börn þeirra voru ekki í húsinu þegar eldurinn kom upp en þau eru stödd í Reykjavík.