Ég sendi ykkur póst varðandi samgöngur til Eyja síðastliðinn sunnudag. Ég hef reyndar ekki fengið svar við þeim pósti, en ákvað engu að síður að senda annan til að vekja enn meiri athygli á okkar málum. Ég er að hugsa um að halda þessu áfram líkt og dagbók um líf okkar hér í Eyjum og leyfa ykkur þannig að fylgjast með. Ég hef það á tilfinningunni að ráðuneytið geri sér ekki fulla grein fyrir því hversu erfiðar samgöngur hafa verið hér í vetur, og því langar mig að gefa ykkur innsýn í það.

Heyrst hefur að búið sé að framlengja samning Innviðaráðuneytisins við Nordlandair um ríkisstyrkt flug til Vestmannaeyja og að sá samningur gildi til 1. maí. Ég hef þó ekki séð þetta auglýst á vef ráðuneytisins og veit því ekki hvort þetta sé rétt. Ég spyr: Hvenær mun flug hefjast og hversu oft í viku verður flogið til Eyja? Ég kalla eftir því að flug verði í boði alla daga vikunnar, en ekki aðeins fjóra daga. Ef þetta reynist rétt viljum við engu að síður þakka fyrir að samningurinn var framlengdur. Það hefði þó verið betra að taka þessa ákvörðun fyrr, þar sem ljóst var að Landeyjahöfn yrði ekki tilbúin fyrir reglubundnar siglingar.

Dýpkunarskipið Álfsnes kom til Landeyjahafnar síðastliðinn sunnudag til að hefja dýpkun. Það gekk ekki betur en svo að dýpið reyndist of lítið til að skipið gæti starfað, samkvæmt því sem sagt er. Álfsnes fór því aftur til Þorlákshafnar í gær, þar sem veðurspáin er óhagstæð fyrir dýpkun. Á morgun, fimmtudag, er spáð betra veðri og vonandi sjáum við skipið aftur í Landeyjahöfn á MarineTraffic. Ég spyr hvort sé til skoðunar að fá hingað – strax, og ekki seinna en í gær – dýpkunarskip sem ræður betur við krefjandi aðstæður en Álfsnes.

Í Vestmannaeyjum búa um 4.700 manns sem þurfa að sækja þjónustu upp á land. Hingað vilja einnig koma gestir og ferðamenn til að heimsækja þennan fallega stað. Hér eru fjölmörg fyrirtæki sem verða af verulegum tekjum vegna þess að ekki er hægt að sigla um Landeyjahöfn. Þar má nefna veitingastaði, hótel, gistiheimili, sjávarútvegsfyrirtæki og byggingarfyrirtæki. Þá er nú verið að byggja upp laxeldi sem vonandi mun skila miklum tekjum í ríkissjóð. Allir þessir aðilar þurfa á öruggum, tíðum og skjótum samgöngum að halda milli Landeyjahafnar og Vestmannaeyja.

Ófær Landeyjahöfn hefur einnig mikil áhrif á íþróttafólk. Löng ferðalög, sjóveiki og óvissa eru ekki aðstæður sem hægt er að bjóða okkar besta fólki eða þeim sem hingað koma til að keppa við ÍBV.

Herjólfur er nú í rúmlega fjögurra klukkustunda siglingu aðra leið til Þorlákshafnar vegna bilunar. Ef kemur í ljós að hann þarf að fara í slipp er líklegt að Baldur leysi hann af. Ef Landeyjahöfn er ekki opin fyrir slíkar siglingar er staðan erfið, þar sem sú ferja tekur færri bíla og aðeins örfáar kojur eru í boði. Þá hef ég einnig heyrt að Baldur hafi ekki haffærnisskírteini til siglinga til Þorlákshafnar.

Varðandi son minn, sem fór í aðgerð, þá fór hann með skipi til Þorlákshafnar. Samningur um flug til Eyja hafði ekki verið framlengdur á þeim tíma, og jafnvel þótt svo hefði verið þá var hann bókaður í aðgerð á miðvikudegi. Ekki er boðið upp á flug frá Eyjum á þriðjudögum og miðvikudögum, sem sýnir enn frekar hversu ófullnægjandi fyrirkomulagið er.

Hvað ferminguna á laugardaginn varðar þá veit ég ekki hversu margir gestir munu mæta, þar sem dýpkun í Landeyjahöfn stendur ekki yfir. Ég mun líklega ekki byrja að baka fyrr en á föstudaginn, þegar ég sé hvort siglt verður um Landeyjahöfn eða Þorlákshöfn.

Þar sem innviðaráðherra virðist ekki hafa fulla yfirsýn yfir ástandið hér í Eyjum, miðað við nýlegt viðtal, hvet ég alla íbúa til að segja frá sinni reynslu af samgöngum og senda tölvupóst til ráðuneytisins og forsætisráðherra.

irn@irn.is
kristrun.frostadottir@althingi.is

Með kveðju og von um svör og aðgerðir,
Þórunn, íbúi í Vestmannaeyjum