Styrkleikar Krabbavarnar og Krabbameinsfélagsins fóru fram í blíðskaparveðri í Herjólfsdal í gær. Styrkleikarnir voru settir á hádegi og var gengið til kl. 20:00.

Styrkleikarnir eru táknræn leið til að sýna fólki sem greinst hefur með krabbamein og aðstandendum þess að samfélagið standi með þeim alla leið.

Viðburðurinn gaf þátttakendum jafnframt tækifæri til hópeflis og góðrar samveru um leið og staðið var saman að mikilvægu málefni.

Göngunni lauk með áhrifamikilli ljósastund við tjörnina í Herjólfsdal. Þar var kertum fleytt á vatninu og hugsað til þeirra sem greinst hafa með krabbamein, auk þess sem þeirra sem látist hafa af völdum sjúkdómsins var minnst.

Óskar Pétur Friðriksson var á staðnum og myndaði.