Víðir Reynisson, þingmaður Samfylkingarinnar í Suðurkjördæmi kvaddi sér hljóðs undir störfum þingsins á þingfundi í dag. Þar ræddi hann samgöngur. Sagði hann að samgöngur séu sífellt úrlausnarefni stjórnmálanna. Samgöngur eru stór hluti af mikilvægum öryggismálum.

„Þjóðvegurinn er jafnframt hættulegasti ferðamannastaðurinn okkar. Við verðum að setja öryggi allra þeirra sem nota vegina okkar í fyrsta sæti því að þjóðvegurinn er á sama tíma lífæð flestra samfélaga.

Í Suðurkjördæmi má t.d. finna marga vegkafla sem eru hættulegir og á sama tíma mjög umferðarþungir. Reykjanesbrautin er einn fjölfarnasti vegur landsins. Mikið hefur verið unnið í tvöföldun hans og aðskilnaði akstursstefna með góðum árangri og fækkun slysa, en betur má ef duga skal og mikilvægt að hraða sem mest tvöföldun vegarins alla leið að flugstöð. Vegir að og um vinsælustu ferðamannastaðina í uppsveitum Árnessýslu bera ekki með neinu öryggi alla þá umferð sem þar er og forgangsraða þarf uppbyggingu vega á því svæði með hliðsjón af öryggi.

Í Öræfunum er fjöldi af einbreiðum brúm og alvarleg slys á því svæði eru algerlega óþolandi. Á sama svæði er viðbúnaðurinn takmarkaður, að hluta til byggður á sjálfboðaliðum björgunarsveitanna. Það er brýnt að hraða útrýmingu einbreiðra brúa og horfa til uppbyggingar vega sem bera raunverulega alla umferðina á þá vinsælu ferðamannastaði sem í Öræfunum eru. Vegurinn um Gatnabrún og Reynisfjall er enn eitt dæmi um erfiðan og hættulegan veg og mikilvægt að skoðaðar verði til hlítar alvörulausnir á þeim vegi með jarðgöngum.

Samgöngur til Vestmannaeyja eru síðan sérkapítuli út af fyrir sig. Nú þarf að tryggja áfram fjármagn til að ljúka rannsóknum og möguleikum á jarðgöngum til Eyja. Á sama tíma þarf að taka saman öll þau gögn sem unnin hafa verið varðandi Landeyjahöfn og ljúka mögulegum aðgerðum á höfninni til að fjölga þeim dögum sem eingöngu er siglt til Landeyja í stað Þorlákshafnar.

Það eru mörg áríðandi verkefni í framhaldinu í samgöngum um allt land og ríkisstjórn Kristrúnar Frostadóttur hefur mikinn metnað til að gera vel í þessum málaflokki,” sagði Víðir í ræðu sinni.