Metin fuku á árshátíð þar sem allt var á útopnu – myndaveisla
Við hæfi er að rifja upp gleðina á árshátíð VSV á dögunum með um 500 ljósmyndum sem hér fylgja. Myndir skrökva sjaldnast. Þarna var fjörið, svikalaust.

Gestir voru alls 360, metfjöldi á árshátíð fyrirtækisins enda stækkar Vinnslustöðvarfjölskyldan og dafnar. Þannig mætti í fyrsta sinn starfsfólk tveggja dótturfélaga, annars vegar Leo Seafood í Eyjum og hins vegar Hólmaskers í Hafnarfirði. Síðarnefndi hópurinn fór um Þorlákshöfn til Eyja.

Ekki vafðist fyrir Einsa kalda og liði hans að fá enn einu sinni fullt hús stiga fyrir veislu og tilheyrandi þjónustu. Við komuna var glæsilegt forréttahlaðborð og eftirrétti var sömuleiðis að finna á hlaðborði. Í millitíðinni var aðalréttur á borð borinn á 360 diskum, nautalund plús meðlæti.

Það hefur víst ekki gerst áður að Einsi kaldi & Co. hafi þjónað svo mörgum til borðs í einu en allt gekk þetta hratt, fumlaust og örugglega. Aðdáunarverð skipulagning og útsjónarsemi.

Höllin var fagurlega skreytt, stórglæsilegur og hlýlegur veislusalur skapaði samkomunni verðuga umgjörð. Sigrún Arna í Heimadecor á skuldlausan heiður af þeirri framkvæmd.

Þá er sjálfgefið að nefna hjónin sem standa að rekstri Hallarinnar, annars vegar Ingunni og Svan, hins vegar Sigurleif og Daníel Geir. Þau standa afar vel að málum og gæta þess að allir hlutir á staðnum séu í fullkomnu lagi og ríflega það.

Auddi og Steindi voru veislustjórar, þaulvanir í þeim efnum og frammistaðan eftir því.

Emmsjé Gauti tróð upp og að sjálfsögðu brast á dansleikur í lokin. Þar voru Bandmenn í aðalhlutverki, kraftmikil sveitaballahljómsveit sem stofnuð var 2015 og kom þá fram í fyrsta sinn í Iðnó á Menningarnótt í Reykjavík.

Bandmenn kunna þá list að halda uppi lífi og fjöri á dansgólfi og segir sína sögu að þeir hófu söng og hljóðfæraslátt kl. 23:30 og voru linnulaust að til kl. 3:30. Engin pása í fjóra tíma, takk fyrir. Það lá við að taka þyrfti rafmagnið af Höllinni til að ljúka ballinu.

Fleiri myndir á vsv.is

https://www.vsv.is/about-vsv/news/metin-fuku-a-arshatid-thar-sem-allt-var-a-utopnu-myndaveisla/
Myndir
Lind Hrafnsdóttir/Tígull
Sjálftökustúdíó