ÍBV tapaði í dag fyrir FH með einu marki 23:24. Leikurinn var nokkuð kaflaskiptur, Eyjamenn voru sterkari lengst af í fyrri hálfleik en það voru þó FH-ingar sem leiddu í hálfleik 10:11 eftir að hafa skorað fjögur síðustu mörk fyrri hálfleiks. Eyjamenn náðu hins vegar aftur forystunni í seinni hálfleik en það stóð ekki lengi yfir og FH-ingar voru með undirtökin lengstum í seinni hálfleik en náðu þó aldrei meira en tveggja marka forystu. Undir lokin var jafnt á öllum tölum síðustu tíu mínúturnar, 19:19, 20:20 og allt þar til staðan var 23:23 og tæp mínúta til leiksloka. FH-ingar voru með boltann og gátu tryggt sér sigurinn í síðustu sókninni en Eyjamenn vörðust vel, fiskuðu ruðning á leikmann FH og komust í sókn þegar um hálf mínúta var eftir. En afar ótímabært skot varð til þess að aftur fengu FH-ingar tækifæri þegar fimmtán sekúndur voru eftir en flestir voru sammála um að brotið hafi verið á sóknarmanni ÍBV En þessar sekúndur dugðu FH-ingum því þremur sekúndum fyrir leikslok skoraði Sigurður Ágústsson sigurmarkið úr þröngu færi af línunni.