Í lok september kvað úrskurðarnefnd um upplýsingamál upp úrskurð í máli er varðar ákvörðun Vestmannaeyjaferjunnar Herjólfs ohf. um að synja beiðni um aðgang að ráðningarsamningum fram­kvæmda­stjóra félagsins og út­gerðarstjóra þess.

Beiðnin var lögð fram 4. mars 2024 og henni synjað 16. apríl sama ár, með þeim rökum að gögn­in féllu undir 1. málsl. 1. mgr. 7. gr. upplýsingalaga, nr. 140/2012, og fél­aginu væri heimilt að takmarka aðgang kæranda að þeim. Í kæru er rakið að um sé að ræða tvo æðstu emb­ætt­is­menn félags sem sé alfarið í eigu Vestmannaeyjabæjar. Til samanburðar gefi sveit­ar­félagið upp laun og samninga sinna æðstu manna.

Framkvæmdastjóri telst til æðstu stjórnenda en ekki útgerðarstjóri

Í máli þessu er deilt um rétt kæranda til aðgangs að ráðningarsamningum framkvæmdastjóra og út­gerð­ar­stjóra Vestmannaeyjaferjunnar Herjólfs ohf. Ákvörðun félagsins er byggð á því að gögnin falli undir 1. málsl. 1. mgr. 7. gr. upplýsingalaga, nr. 140/2012, og verði ekki afhent. Ákvæðið hljóð­ar svo:

Réttur almennings til aðgangs að gögnum um málefni starfsmanna sem starfa hjá aðilum sem lög þessi taka til skv. 2. gr. tekur ekki til gagna í málum sem varða umsóknir um starf, framgang í starfi eða starfssambandið að öðru leyti.

Fram kemur í niðurstöðukafla að úrskurðurinn staðfesti að þó svo að fyrirtækið geti takmarkað aðgang að ráðningarsamningum samkvæmt lögum, eigi opinberar stofnanir að veita upplýsingar um launakjör æðstu stjórnenda. Framkvæmdastjóri telst til æðstu stjórnenda, og því hafi almenningur rétt á að vita laun hans.

Telur úrskurðarnefndin að fyrirtækinu sé skylt að afhenda kæranda þann hluta ráðningarsamningsins sem hefur að geyma upplýsingar um launakjör framkvæmda­stjóra félagsins. Að öðru leyti verður ákvörðun félagsins að hafna beiðni kæranda staðfest.

Útgerðarstjóri telst hins vegar ekki æðsti stjórnandi samkvæmt lögunum, þannig að laun hans þarf ekki að gera opinber.

Skuli veita kæranda, aðgang að upplýsingum

Í úrskurðarorðum nefndarinnar segir að Vestmannaeyjaferjan Herjólfur ohf. skuli veita kæranda, aðgang að launaupplýsingum framkvæmdastjóra en getur haldið trúnað um laun útgerðarstjóra.

Úrskurðinn í heild sinni má lesa hér.