Aðeins rúmum tveimur mánuðum eftir sveitarstjórnarkosningarnar í maí hefur verið endurraðað í nokkrar nefndir, stjórnir og fulltrúasæti Vestmannaeyjabæjar.

Bæjarráð samþykkti breytingarnar samhljóða á fundi sínum. Þær snúa meðal annars að fulltrúum á landsþingi Sambands íslenskra sveitarfélaga, aðalfundi Samtaka sunnlenskra sveitarfélaga og í stjórn Eyglóar ehf.

Arndís María Kjartansdóttir tekur við sem aðalfulltrúi á landsþingi Sambands íslenskra sveitarfélaga af Jóni Þór Guðjónssyni. Anton Örn Björnsson verður varamaður í stað Sæunnar Magnúsdóttur.

Anton Örn verður jafnframt aðalfulltrúi á aðalfundi Samtaka sunnlenskra sveitarfélaga í stað Sæunnar, sem tekur sæti hans sem varafulltrúi. Erlingur Guðbjörnsson og Hildur Rún Róbertsdóttir verða varafulltrúar í stað Jóhanns Inga Óskarssonar og Sonju Andrésdóttur.

Þá tekur Anton Örn sæti Jóns Þórs sem aðalfulltrúi í stjórn Eyglóar ehf. og Arndís María verður varamaður í stað Sæunnar. Einnig verður Þór Vilhjálmsson varamaður í yfirkjörstjórn í stað Guðna Hjörleifssonar.

Breytingarnar voru samþykktar samhljóða og teljast fullnaðarafgreiðsla bæjarráðs í sumarleyfi bæjarstjórnar.