Hauststarf Pílufélags Vestmannaeyja er að hefjast og nú gefst fólki á öllum aldri tækifæri til að dusta rykið af pílunum og snókerkjuðanum. Framundan er fjölbreytt starf fyrir bæði börn og fullorðna, þar á meðal deildarkeppni í pílu, æfingar fyrir 18 ára og yngri og áframhaldandi aðgangur að glæsilegri aðstöðu félagsins.

Vöruhúsdeildin 2026

Skráning er hafin í Vöruhúsdeildina 2026, hina vinsælu deildarkeppni Pílufélags Vestmannaeyja. Í fyrsta sinn verður deildin haldin að hausti en fyrsta umferð fer fram 28. september.

Keppendum verður skipt í deildir eftir styrkleika þannig að allir fái jafna og skemmtilega leiki, óháð reynslu og getu. Úrslitakeppnin verður síðan haldin með glæsibrag í Höllinni 21. nóvember.

Skráning í deildina stendur yfir til 25. september.

U18-æfingar hefjast í september

Pílufélagið býður einnig upp á æfingar fyrir börn og ungmenni. U18-æfingar verða á laugardögum frá klukkan 16 til 17 í húsnæði félagsins. Fyrsta æfingin verður laugardaginn 12. september og er æfingagjald fyrir tímabilið 2026–2027 15.000 krónur.