Árni Þór Ingólfsson hóf nám í húsasmíði árið 2023 og vinnur nú hjá Sæla og Sigga, þar sem honum líkar vel. „Þeir eru æðislegir,“ segir hann og hlær. „Ég byrjaði hjá þeim fyrr í sumar og hef lært mikið.“ 

Árni Þór stefnir á sveinspróf næsta vor og er ánægður með námið. „Kennslan er mjög góð og ég hef verið hjá Halldóri allan tímann. Við byrjuðum á að læra á handverkfæri og smíða meðal annars koll og tröppur. Nú tekur við undirbúningur fyrir sveinsprófið og námið er mjög fjölbreytt,“ segir Árni Þór. Það sama á við um vinnuna. 

„Við erum að smíða þök, smíða og setja í glugga og hurðir og vinna við innréttingar. Það er nóg að gera og skemmtilegt bæði í vinnunni og skólanum,“ segir Árni Þór, sem horfir björtum augum til framtíðar.