Eyjakonan Hekla Hannesdóttir stóð sig vel í landsliðakeppni í Bakgarðshlaupi sem fram fór í Elliðaárdal um helgina og stendur enn yfir. Hekla lauk keppni eftir 35 hringi og bætti þar með sinn besta árangur um tvo hringi. Eyjamaðurinn Friðrik Benediktsson var einnig hluti af íslenska landsliðinu og tók þátt í hlaupinu.

Hekla var jafnframt sú kona í íslenska landsliðinu sem fór lengst í keppninni.

Foreldrar Heklu eru þau Hrund Óskarsdóttir og Hannes Vilhjálmson.

Í bakgarðshlaupi leggja keppendur af stað í 6,7 kílómetra hring á hverri klukkustund og þurfa að vera komnir í mark áður en næsti hringur hefst. Keppnin heldur þannig áfram þar til hlauparar hætta eða ná ekki að ljúka hring innan klukkustundarinnar.

Hekla hafði fyrir keppnina lengst hlaupið 33 hringi í bakgarðshlaupi en náði nú 35 hringjum. Það jafngildir um 234,5 kílómetrum á 35 klukkustundum.

Hekla og Friðrik voru á meðal fimmtán hlaupara sem skipuðu íslenska landsliðið í keppninni. Liðið keppir við landslið víða um heim en samanlagður fjöldi hringja liðsmanna ræður árangri hverrar þjóðar í landsliðakeppninni.