Portúgalski leikmaðurinn Vítor Rocha Pisco hefur gengið til liðs við ÍBV í fótbolta og gerir eins árs samning við félagið. Hann lék áður með AD Sanjoanense og Karvan Yevklakh í Aserbaídsjan. ÍBV greindi frá tíðindunum á samfélagsmiðlum sínum í gær.

Vítor er 29 ára miðjumaður og segir hann í tilkynningunni að hann sé ánægður með að samþykkja eins árs samning við ÍBV og lítur á það sem frábært tækifæri til að efla atvinnumannaferil sinn. 

,,Ísland er frábært land og ÍBV er metnaðarfullt félag með mikla sögu”.

Þrátt fyrir að koma úr mun hlýrra loftslagi hefur hann engar áhyggjur af íslensku veðri. Honum hefur verið tekið mjög vel og hlakkar til að hefja tímabilið. Hann nefndi þó að hann hafi aldrei séð jafn mikinn snjó.

ÍBV hefur tímabilið í 32-liða úrslitum Mjólkurbikarsins á laugardaginn gegn Þrótti Reykjavík. Leikurinn hefst kl 12:00 á Hásteinsvelli.