Innviðaráðuneytið hefur úrskurðað að ákvörðun Vestmannaeyjabæjar um að segja starfsmanni sveitarfélagsins upp störfum hafi verið ólögmæt. Ráðuneytið taldi að uppsögnin hefði ekki uppfyllt skilyrði kjarasamnings og því ekki verið byggð á lögmætum grundvelli.

Úrskurðurinn var kveðinn upp 11. júní síðastliðinn og varðar ákvörðun Vestmannaeyjabæjar frá 19. nóvember 2024. Starfsmanninum var sagt upp með þriggja mánaða uppsagnarfresti og var ekki óskað eftir vinnuframlagi á uppsagnartímanum.

Þetta er annar úrskurðurinn sem Eyjafréttir hafa undir höndum þar sem innviðaráðuneytið kemst að þeirri niðurstöðu að uppsögn starfsmanns Vestmannaeyjabæjar hafi verið ólögmæt. Málin eru ótengd og byggjast á ólíkum málsatvikum og lagalegum forsendum.

Eyjafréttir birta hvorki nafn starfsmannsins, kyn, starfsheiti, vinnustað né aðrar persónugreinanlegar upplýsingar.

Fékk áminningu og tækifæri til að bæta ráð sitt

Starfsmanninum var veitt skrifleg áminning 2. júlí 2024 vegna tiltekinna atvika. Í áminningunni kom fram að viðkomandi fengi tækifæri til að bæta ráð sitt, en að annars gæti komið til uppsagnar samkvæmt ákvæðum kjarasamnings.

Fleiri kvartanir komu fram eftir að áminningin hafði verið veitt og tók Vestmannaeyjabær í kjölfarið ákvörðun um að segja starfsmanninum upp.

Ráðuneytið tók ekki afstöðu til efnis þeirra atvika sem lágu að baki málinu. Úrlausn þess laut að því hvort Vestmannaeyjabær hefði staðið löglega að uppsögninni.

Atvikin urðu fyrir áminninguna

Samkvæmt viðeigandi ákvæði kjarasamnings var sveitarfélaginu skylt að áminna starfsmanninn skriflega og veita viðkomandi tíma og tækifæri til að bæta ráð sitt áður en gripið yrði til uppsagnar.

Ráðuneytið bendir á að tilgangur skriflegrar áminningar sé að gefa starfsmanni kost á að bæta ráð sitt og vara jafnframt við því að áframhaldandi eða ítrekuð háttsemi geti leitt til uppsagnar.

Ástæða uppsagnar í kjölfar áminningar þurfi því að vera af sama toga og sú háttsemi sem áminningin laut að. Um ítrekun verði að vera að ræða.

Þótt fleiri kvartanir hefðu komið fram eftir að áminningin var veitt báru gögn málsins með sér að atvikin sem þær vörðuðu áttu öll að hafa gerst áður en starfsmanninum var veitt áminningin.

Ráðuneytið taldi því ekki unnt að líta á þessi atvik sem ítrekun á háttsemi eftir áminninguna.

Ekki sýnt fram á ítrekun

Í úrskurðinum segir að Vestmannaeyjabær hafi ekki sýnt fram á að fyrir lægju upplýsingar eða gögn sem bentu til þess að starfsmaðurinn hefði aftur sýnt af sér þá háttsemi sem áminningin laut að og viðkomandi var gert að bæta úr.

Ráðuneytið komst því að þeirri niðurstöðu að uppsögnin hefði ekki uppfyllt skilyrði kjarasamningsins og væri ekki byggð á lögmætum grundvelli.

Í úrskurðarorði segir: „Hin kærða ákvörðun Vestmannaeyjabæjar frá 19. nóvember 2024 um að segja kæranda upp störfum er ólögmæt.“

Ráðuneytið gerði hins vegar ekki athugasemd við málsmeðferð sveitarfélagsins vegna skriflegu áminningarinnar.

Bærinn taldi málefnalegar ástæður fyrir uppsögn

Vestmannaeyjabær byggði á því fyrir ráðuneytinu að málið hefði verið rannsakað með fullnægjandi hætti, starfsmanninum hefði verið gefinn kostur á að koma sjónarmiðum sínum á framfæri og reynt hefði verið að finna aðrar lausnir.

Það hefði verið mat stjórnenda að nauðsynlegt traust væri ekki lengur fyrir hendi og að málefnalegar ástæður hefðu staðið til þess að segja starfsmanninum upp.

Ráðuneytið féllst þó ekki á að þau atvik sem uppsögnin byggðist á gætu talist ítrekun eftir áminningu, þar sem þau áttu öll að hafa gerst áður en hún var veitt.

Úrskurðurinn kveður ekki á um endurráðningu eða bætur

Ráðuneytið tók fram að það gæti ekki fellt uppsögnina úr gildi, þar sem það myndi jafngilda því að setja starfsmanninn aftur í starf. Slíkt væri ekki á valdsviði ráðuneytisins.

Úrskurðurinn kveður heldur ekki á um bótagreiðslur til starfsmannsins. Náist ekki samkomulag milli aðila getur komið til þess að dómstólar meti sjálfstætt hvort skilyrði bótaábyrgðar Vestmannaeyjabæjar séu uppfyllt.

Eyjafréttir hafa óskað eftir viðbrögðum Vestmannaeyjabæjar við úrskurðinum. Meðal annars var spurt hvort bærinn hygðist una niðurstöðunni eða láta reyna á hana fyrir dómstólum, hvort málið hefði leitt til sáttar eða bótagreiðslna og hvort verklag við meðferð starfsmannamála hefði verið endurskoðað.

Umfjöllun Eyjafrétta um fyrra málið:

Fyrirvaralaus uppsögn kennara hjá Vestmannaeyjabæ ólögmæt

Innviðaráðuneytið hefur úrskurðað að ákvörðun Vestmannaeyjabæjar um að segja kennara fyrirvaralaust upp störfum hafi verið ólögmæt. Ráðuneytið telur að ákvörðunin hafi ekki byggst á málefnalegum sjónarmiðum og að sveitarfélagið hafi ekki sýnt fram á að meðalhófsreglu stjórnsýslulaga hafi verið nægilega gætt.  Úrskurðurinn var kveðinn upp 4. ágúst síðastliðinn. Kennarinn hafði kært ákvörðun Vestmannaeyjabæjar frá 4. […]