Vestmannaeyjabær hefur auglýst útboð vegna fyrirhugaðrar viðbyggingar við Íþróttamiðstöðina, en um er að ræða tæplega 2.000 fermetra, tveggja hæða byggingu sem mun stórbæta alla aðstöðu fyrir íþróttaiðkendur, nemendur og gesti.

Á neðri hæð verða nýir og fullbúnir búningsklefar ásamt endurbættri aðstöðu þar sem lögð verður áhersla á hagkvæmni og gæði. Efri hæðin verður hins vegar afhent fokheld, sem gefur möguleika á frekari uppbyggingu síðar.

Viðbyggingin verður klædd með álklæðningu og búin vönduðum gluggum sem hannaðir eru til að standast erfið veðurskilyrði. Umfang framkvæmdanna er talsvert en áætlað er að um 1.500 rúmmetrar af steinsteypu og 88 tonn af bendistáli fari í bygginguna.

Samkvæmt áætlunum á verkinu að ljúka 1. maí 2028, en tilboðsfrestur rennur út þriðjudaginn 14. apríl, að því er segir í frétt á vef bæjaryfirvalda.