Hópurinn sem stendur að tónlistarsveitinni Blítt og létt á mikið hrós skilið fyrir að viðhalda einum helsta menningararfi Vestmannaeyja hátt á lofti, sjálfri Eyjatónlistinni. Hálfsmánaðarlega stendur hópurinn fyrir Eyjakvöldum á Kaffi Kró, þar sem Eyjalögunum er gert hátt undir höfði. Vestmannaeyingar og gestir þeirra hafa svo ekki látið sitt eftir liggja því yfirleitt er fullt hús á þessum kvöldum. Ekki er nóg með að Blítt og létt hópurinn standi fyrir þessum tónlistarkvöldum í Eyjum, heldur hafa þeir heimsótt meginlandið og kynnt þessa tónlist meðal annarra Íslendinga við góðar undirtektir. Í kvöld verða þeir svo ásamt öðrum Eyjamönnum á skemmtistaðnum Spot í Kópavogi, að afloknum minningartónleikum um Ása í Bæ.