Dýpkunarskipið Álfsnes náði loks að dæla sandi í og við Landeyjahöfn í gær.  Að sögn G. Péturs Matthíassonar, forstöðumanns samskiptadeildar Vegagerðarinnar gekk vel að dýpka í og við Landeyjahöfn síðdegis í gær. Dýpkun hófst um kl. 16:30 og var unnið í um fjóra tíma við góðar aðstæður. Vonir standa til að framhaldið verði með svipuðum hætti.

Bæjaryfirvöld í Vestmannaeyjum hafa lýst yfir miklum áhyggjum af stöðu samgangna, þar sem höfnin hefur verið lokuð meira og minna það sem af er ári og dýpkun gengið hægt. Ástandið hefur haft veruleg áhrif á siglingar Herjólfs og samgöngur við Vestmannaeyjar almennt, og hefur verið kallað eftir tafarlausum aðgerðum.

Uppfært kl. 10.55

Að sögn G. Péturs hefur dýpkun í og við Landeyjahöfn gengið vel undanfarna klukkutíma. Dýpkunarskipið Álfsnesið hefur náð að dýpka í hafnarmynninu bæði á flóðum í gærkvöldi og í morgun, með góðum árangri. „Dýpkun er enn háð sjávarföllum, það er lítillega hækkandi alda í dag en við erum bjartsýn á að ná að nýta næstu flóð.”

Samkvæmt upplýsingum Vegagerðarinnar er mjög góð veðurspá frá mánudegi og út alla næstu viku, sem gefur tilefni til aukinnar bjartsýni um framhaldið.