Rás atburða skilaði mér í sæti á lista Miðflokksíns í Suðurkjördæmi og þar með var ég kominn í framboð í Vestmannaeyjum. Mér rennur blóðið til skyldunnar í orðsins fyllstu merkingu.

Svo ég geri lítillega grein fyrir tengslum mínum við Eyjarnar leyfi ég mér geta þess að foreldrar mínir Ísleifur Pálsson og Ágústa Jóhannsdóttir voru bæði fædd og uppalin í Vestmannaeyjum. Þeim varð þriggja sona auðið og sýndu þá átthagatryggð búandi í Reykjavík að fá Eyjaprest, sr. Sigurjón Þ. Árnason, til að skíra okkur alla.

Föðurafi minn Páll Oddgeirsson rak verslun og útgerð í Vestmannaeyjum og er minnst fyrir að hafa haft forgöngu um minnismerkið við Landakirkju um þá sem hafa drukknað í sjó og hrapað í björgum. Páll var sonur sr. Oddgeirs Þórðarsonar Guðmundsen, sem þjónaði Eyjunum í ríflega aldarþriðjung við miklar vinsældir. Föðuramma mín, Matthildur Ísleifsdóttir var frá Kirkjubæ. Móðuramman, Magnea D. Þórðardóttir, var húsfreyja í Fagurlyst, ættuð úr Árnes- og Rangárvallasýslum.

Móðurafi minn var Jóhann Þ. Jósefsson, kaupmaður og útgerðarmaður og þingmaður Eyjanna í 36 ár á árunum 1923-59 þegar þær voru einmenningskjördæmi. Hann var rótgróinn Eyjamaður og í gegnum hann á ég ættlegg í Vestmannaeyjum svo langt sem kirkjubækur ná aftur á miðja 18. öld. Ég ólst upp við hin miklu hugsjónamál móðurafa míns sem þingmanns Eyjanna að bæta hag Eyjamanna og gera hlut Vestmannaeyja sem mestan. Hagur Eyjanna er mér í blóð borinn. Ég drakk hann með móðurmjólkinni.

Jóhann móðurafi minn var gegndi veigamiklum ráðherraembættum í ríkisstjórn Stefáns Jóhanns Stefánssonar 1947-49 og í minnihlutastjórn Ólafs Thors 1949-50. Hin fyrrgreinda tók meginákvarðanir um framtíð landsins, í utanríkismálum með stofnaðild að Atlantshafsbandalaginu og í sjávarútvegsmálum með lögunum um vísindalega verndun fiskimiða landgrunnsins sem allar útfærslur landhelginnar voru reistar á. Miklu hefur skipt fyrir Eyjarnar að hafa átt á að skipa slíkum forystumanni í þjóðmálum sem átti í krafti þeirrar stöðu kost á að leggja lóð á vogarskálar framfara í sinni heimabyggð.

Rætur mínar í Eyjum, sem hér hafa verið raktar að nokkru, leiða af sér að ég gleðst yfir að geta að vissu leyti talið mig Eyjamann uppi á landi. Meðal minna staða í Vestmannaeyjum eru Fagurlyst og Miðgarður, heimili móður- og föðurfólks, Kirkjubær eins og áður getur og Ofanleiti þar sem sr. Oddgeir bjó meðan hann þjónaði Eyjunum.

Eyjarnar eru einstakt byggðarlag á Íslandi með sitt fjölskrúðuga mannlíf og sterku atvinnuvegi auk náttúrufegurðar og langrar sögu og menningar. Nái ég kjöri til Alþingis mun ég leggja mig allan fram í þágu Suðurkjördæmis og sér í lagi Eyjanna eins og forfeður mínir hafa áður gert við mikið traust Eyjamanna.

Ólafur Ísleifsson

Höfundur skipar 3. sæti á framboðslista Miðflokksins í Suðurkjördæmi.