Það var ánægjulegt að sjá ársreikning Vestmannaeyjabæjar fyrir árið 2025. Bærinn okkar stendur sterkt og reksturinn var jákvæður um 781 milljón króna. Þessi góða staða er traustur grunnur sem við getum byggt ofan á, en hún krefst þess líka að við spyrjum okkur að því hvað ætlum við að gera við þennan árangur? 

Fyrir Eyjalistanum er góður rekstur ekki markmið í sjálfu sér, heldur tæki til að gera gott samfélag enn betra. Þegar gengur vel verðum við að þora að fjárfesta í grunnstoðunum okkar. Við hjá Eyjalistanum trúum því að sterkir innviðir og öflug þjónusta séu besta leiðin til að tryggja vellíðan allra bæjarbúa.

Innviðir eru fjárfesting í fólki

Eyjalistinn sér fram á mikla fólksfjölgun og vöxt í samfélaginu á næstu árum, sem er dásamlegt merki um lífskraftinn í Eyjum. En hvernig ætlum við að mæta þessari fjölgun?

Við megum ekki endalaust safna í sjóði á meðan það þrengir að börnum okkar og fjölskyldum. Þess vegna vill Eyjalistinn flýta uppbyggingu nýs leikskóla og móta skýra framtíðarsýn fyrir skólabyggingarnar okkar sem og íþróttasvæðið áður en það verður of seint. Við verðum að geta treyst því að grunn viðhaldi sé sinnt, hvort sem það er að skipta um ljósaperur í íþróttamannvirkjum eða huga að húsbúnaði í skólabyggingunum okkar.

Fjárfesting í innviðum snýst líka um að hlúa að því sem við höfum og gera það aðgengilegra. Við þurfum að ráðast í endurbætur á Kviku til að tryggja öryggi gesta og tryggja Lista- og menningarfélaginu varanlegt húsnæði til að halda áfram með sitt góða starf. Þá telur Eyjalistinn mikil tækifæri felast í því að færa félagsmiðstöðina Féló í meiri nálægð við Barnaskólann. Með því að koma starfseminni nær daglegu lífi unglinganna okkar eflum við starfið og gerum það mun aðgengilegra þeim sem sækja þangað. Þá yrði hægt að samnýta Féló með skólanum.

Hækka þarf frístundastyrkinn til muna til að mæta fjölskyldum og huga þarf að gjaldskrám bæjarins. Þegar vel gengur er ekki rétt að fjölskyldur fái að njóta góðs af því?

Samhliða uppbyggingu hér heima verðum við að vera óþreytandi í hagsmunagæslu gagnvart ríkinu. Öruggar samgöngur og trygg heilbrigðisþjónusta eru grundvallarréttindi sem við megum aldrei láta undan í. Við þurfum að fylgja eftir mikilvægum verkefnum á borð við nýja vatnslögn og stórskipahöfn á Eiðinu, sem eru lífæðar samfélagsins og atvinnulífsins. Einnig brennur það á Eyjalistanum að við tryggjum öldruðum í bænum okkar þá þjónustu og virðingu sem þeir eiga skilið. Frístundastyrkur eldri borgara er tækifæri fyrir okkur að gera vel við þá sem hafa byggt upp okkar góða samfélag.

Með hjartað á réttum stað

Ég viðurkenni það fúslega að þetta er allt nýtt fyrir mér. Ég er kennari, faðir og hógvær að eðlisfari. Að bjóða sig fram í 2. sæti á Eyjalistanum krefst þess að ég stígi út fyrir þægindarammann og sýni á mér allar hliðar. En drifkrafturinn minn er skýr. Ég vil nýta kraftinn sem býr í sterkum bæjarsjóði til að styrkja samfélagið okkar með því að fjárfesta í okkar innviðum.

Eyjalistinn er félagshyggju framboð. Félagshyggja í mínum augum snýst um að enginn verði eftir. Að við nýtum fjármunina í nærumhverfið okkar, listir, menningu og menntun. Við eigum að nýta hagnaðinn til að gera lífið í Eyjum auðveldara og skemmtilegra fyrir allar fjölskyldur.

Góður ársreikningur gefur okkur svigrúm til að láta verkin tala. Við hjá Eyjalistanum erum tilbúin í þá vegferð, með hagsmuni heildarinnar og framtíð barnanna okkar að leiðarljósi.

Anton Örn Björnsson

Höfundur skipar 2. sæti á Eyjalistanum.